kwa unyenyekevu wote na upole, kwa uvumilivu, mkichukuliana katika upendo;
Mkijitahidi kuuhifadhi umoja wa Roho katika kifungo cha amani.
Kuna mwili mmoja, na Roho mmoja, kama vile mlivyoitwa katika tumaini moja la wito wenu;
Bwana mmoja, imani moja, ubatizo mmoja,
Mungu mmoja na Baba wa wote, aliye juu ya yote na katika yote na ndani ya yote.
Lakini kila mmoja wetu amepewa neema kwa kadiri ya kipimo cha kipawa cha Kristo.
Kwa hiyo husema, Alipopaa juu aliteka mateka, akawapa wanadamu vipawa.
(Basi kwa kuwa yeye alipaa, ni nini ila kwamba alishuka kwanza hata sehemu za chini za nchi?
Yeye aliyeshuka ndiye aliyepaa juu sana kupita mbingu zote, ili avijaze vitu vyote.)
Naye alitoa wengine kuwa mitume; na wengine manabii; na wengine kuwa wainjilisti; na wengine kuwa wachungaji na waalimu;
kwa kusudi la kuwakamilisha watakatifu, hata kazi ya huduma itendeke, hata mwili wa Kristo ujengwe;
Hata na sisi sote tutakapoufikia umoja wa imani na kumfahamu sana Mwana wa Mungu, hata kuwa mtu mkamilifu, hata kufika kwenye cheo cha kimo cha utimilifu wa Kristo;
ili tusiwe tena watoto wachanga, tukitupwa huku na huku, na kuchukuliwa na kila upepo wa elimu, kwa hila ya watu, kwa ujanja, tukiziotea kudanganya;
Lakini tuishike kweli katika upendo na kukua hata tumfikie yeye katika yote, yeye aliye kichwa, Kristo;
ambaye kutoka kwake mwili wote ukiungamanishwa na kushikamanishwa kwa msaada wa kila kiungo, kwa kadiri ya utendaji kazi wake katika kipimo cha kila kiungo, hukuza mwili hata ukijijenga wenyewe katika upendo.
Basi nasema neno hili na kushuhudia katika Bwana, kwamba tangu sasa msienende kama waenendavyo Mataifa wengine, katika ubatili wa nia zao;
akili zao zimetiwa giza, wametengwa na uzima wa Mungu kwa sababu ya ujinga uliomo ndani yao, na kwa sababu ya upofu wa mioyo yao;
Ambao wamezimia, wamejitia katika ufisadi na kufanya uchafu wote kwa kutamani.
Lakini ninyi hamkumjifunza Kristo hivyo;
ikiwa mmemsikia na kufundishwa naye kama kweli ilivyo ndani ya Yesu;
Mvue kwa habari ya mwenendo wa kwanza utu wa kale, unaoharibika kwa kuzifuata tamaa danganyifu;
Mfanywe wapya katika roho ya nia zenu;
mkavae utu mpya, ulioumbwa kwa namna ya Mungu katika haki na utakatifu wa kweli.
Kwa hiyo uvueni uongo, mkaseme kweli kila mtu na jirani yake;
Mwe na hasira, wala msitende dhambi;
wala msimpe ibilisi nafasi.
Aliyeiba asiibe tena, bali afadhali afanye bidii, akitenda kazi iliyo njema kwa mikono yake, apate kuwa na kitu cha kumgawia mhitaji.
Neno lo lote lililo ovu lisitoke vinywani mwenu, bali lililo jema la kumfaa mwenye kuhitaji, ili liwape neema wanaosikia.
Wala msimhuzunishe yule Roho Mtakatifu wa Mungu, ambaye kwa yeye mlitiwa muhuri hata siku ya ukombozi.
Uchungu wote na ghadhabu na hasira na kelele na matukano yaondoke kwenu pamoja na kila namna ya ubaya.
Tena iweni wafadhili ninyi kwa ninyi, wenye huruma, mkasameheane kama na Mungu kwa ajili ya Kristo alivyowasamehe ninyi.