Biblia ya King James Version

Mathayo, Sura ya 7:

  1. Msihukumu msije mkahukumiwa.
  2. Kwa maana hukumu ile mhukumuyo, ndiyo mtakayohukumiwa; na kipimo kile mpimacho, ndicho mtakachopimiwa.
  3. Na kwa nini wakitazama kibanzi kilicho katika jicho la ndugu yako, lakini huioni boriti iliyo ndani ya jicho lako mwenyewe?
  4. Au wawezaje kumwambia ndugu yako, Acha nikutoe kibanzi katika jicho lako; na tazama, boriti imo katika jicho lako mwenyewe?
  5. Mnafiki wewe, itoe kwanza ile boriti katika jicho lako mwenyewe; ndipo utakapoona vizuri kukitoa kile kibanzi katika jicho la ndugu yako.
  6. Msiwape mbwa kilicho kitakatifu, wala msiwatupe nguruwe lulu zenu, wasije wakazikanyaga chini ya miguu yao, wakageuka na kuwararua.
  7. Ombeni, nanyi mtapewa; tafuteni, nanyi mtapata; bisheni, nanyi mtafunguliwa;
  8. Kwa maana kila aombaye hupokea; naye atafutaye huona; naye abishaye atafunguliwa.
  9. Au kuna mtu yupi kwenu ambaye mtoto wake akimwomba mkate, atampa jiwe?
  10. Au akimwomba samaki, atampa nyoka?
  11. Ikiwa ninyi, mlio waovu, mnajua kuwapa watoto wenu vipawa vyema, si zaidi sana Baba yenu aliye mbinguni atawapa mema wao wamwombao?
  12. Basi yo yote mtakayo mtendewe na watu, nanyi watendeeni vivyo hivyo; kwa maana hiyo ndiyo torati na manabii.
  13. Ingieni kwa mlango ulio mwembamba; maana mlango ni mpana, na njia ni pana iendayo upotevuni, nao ni wengi waingiao kwa mlango huo;
  14. Kwa maana mlango ni mwembamba, na njia imesonga iendayo uzimani, nao waionao ni wachache.
  15. Jihadharini na manabii wa uongo, watu wanaowajia wamevaa mavazi ya kondoo, walakini kwa ndani ni mbwa-mwitu wakali.
  16. Mtawatambua kwa matunda yao. Je! watu huchuma zabibu kwenye miiba, au tini kwenye michongoma?
  17. Vivyo hivyo kila mti mzuri huzaa matunda mazuri; bali mti mwovu huzaa matunda mabaya.
  18. Mti mzuri hauwezi kuzaa matunda mabaya, wala mti mbaya hauwezi kuzaa matunda mazuri.
  19. Kila mti usiozaa matunda mazuri hukatwa na kutupwa motoni.
  20. Kwa hiyo kwa matunda yao mtawatambua.
  21. Si kila mtu aniambiaye, Bwana, Bwana, atakayeingia katika ufalme wa mbinguni; bali ni yeye afanyaye mapenzi ya Baba yangu aliye mbinguni.
  22. Wengi wataniambia siku ile, Bwana, Bwana, hatukufanya unabii kwa jina lako? na kwa jina lako kutoa pepo? na kwa jina lako kufanya miujiza mingi?
  23. Ndipo nitawaambia dhahiri, Sikuwajua ninyi kamwe; ondokeni kwangu, ninyi watenda maovu.
  24. Basi kila asikiaye hayo maneno yangu, na kuyafanya, atafananishwa na mtu mwenye akili, aliyejenga nyumba yake juu ya mwamba;
  25. Mvua ikanyesha, mafuriko yakaja, pepo zikavuma, zikaipiga nyumba ile; nayo haikuanguka, kwa maana misingi yake imewekwa juu ya mwamba.
  26. Na kila asikiaye hayo maneno yangu asiyafanye, atafananishwa na mtu mpumbavu, aliyejenga nyumba yake juu ya mchanga;
  27. Mvua ikanyesha, mafuriko yakaja, pepo zikavuma, zikaipiga nyumba ile; ikaanguka: na anguko lake lilikuwa kubwa.
  28. Ikawa Yesu alipomaliza kusema hayo, umati wa watu ulishangazwa na mafundisho yake;
  29. Kwa maana aliwafundisha kama mtu mwenye mamlaka, wala si kama waandishi.