Kitabu cha Luka, Biblia ya Sauti Bila Malipo, Biblia ya King James Version katika Kiswahili
Biblia ya King James Version
Luka, Sura ya 18:
Akawaambia mfano, ya kwamba imewapasa kumwomba Mungu sikuzote, wala wasikate tamaa;
Akasema, Palikuwa na hakimu katika mji mmoja, asiyemcha Mungu, wala kumjali mtu;
Na katika mji ule palikuwa na mjane; akamwendea akisema, Nipatie kisasi kwa adui yangu.
Lakini baadaye akasema moyoni mwake, Ijapokuwa simchi Mungu, wala simjali mwanadamu;
Lakini, kwa kuwa mjane huyu ananisumbua, nitampatia haki, asije akanichosha kwa kuja kwake daima.
Bwana akasema, Sikieni asemavyo hakimu dhalimu.
Je! Mungu hatawapatia haki wateule wake wanaomlilia mchana na usiku, ijapokuwa mvumilivu pamoja nao?
Nawaambia ya kwamba atawalipiza kisasi upesi. Lakini Mwana wa Adamu atakapokuja, je! atapata imani duniani?
Akawaambia mfano huu watu waliojiona kuwa wao ni wenye haki, na kuwadharau wengine;
Watu wawili walipanda kwenda hekaluni kusali; mmoja Farisayo, na mwingine mtoza ushuru.
Yule Farisayo akasimama akaomba hivi moyoni mwake, Ee Mungu, nakushukuru kwa kuwa mimi si kama watu wengine, wanyang’anyi, wadhalimu, wazinzi, wala kama huyu mtoza ushuru.
Mimi nafunga mara mbili kwa juma, natoa zaka ya kila kitu nilicho nacho.
Lakini mtoza ushuru akasimama kwa mbali, wala hakuthubutu hata kuinua macho yake mbinguni, bali akijipiga-piga kifua akisema, Ee Mungu, niwie radhi mimi mwenye dhambi.
Nawaambia, huyu alishuka nyumbani kwake amehesabiwa haki kuliko yule; kwa maana kila ajikwezaye atadhiliwa; naye ajinyenyekezaye atakwezwa.
Wakamletea pia watoto wachanga ili awaguse; lakini wanafunzi wake walipoona wakawakemea.
Lakini Yesu akawaita, akasema, Waacheni watoto wadogo waje kwangu, wala msiwazuie, kwa maana ufalme wa Mungu ni wao.
Amin, nawaambia, Mtu ye yote asiyeupokea ufalme wa Mungu kama mtoto mdogo hataingia humo kamwe.
Mkuu mmoja akamwuliza, akisema, Mwalimu mwema, nifanye nini ili niurithi uzima wa milele?
Yesu akamwambia, Mbona unaniita mwema? hakuna aliye mwema ila mmoja, yaani, Mungu.
Unazijua amri, Usizini, Usiue, Usiibe, Usishuhudie uongo, Waheshimu baba yako na mama yako.
Akasema, Hayo yote nimeyashika tangu ujana wangu.
Yesu aliposikia hayo akamwambia, Umepungukiwa na neno moja bado; viuze vyote ulivyo navyo, wagawie maskini, nawe utakuwa na hazina mbinguni; kisha njoo unifuate.
Naye aliposikia hayo, alihuzunika sana, kwa maana alikuwa tajiri sana.
Naye Yesu alipomwona anahuzuni sana, akasema, Jinsi itakavyokuwa shida wenye mali kuingia katika ufalme wa Mungu!
Kwa maana ni rahisi zaidi kwa ngamia kupenya tundu la sindano, kuliko tajiri kuingia katika ufalme wa Mungu.
Nao waliosikia wakasema, Ni nani basi awezaye kuokolewa?
Akasema, Yasiyowezekana kwa wanadamu, yanawezekana kwa Mungu.
Ndipo Petro akasema, Tazama, sisi tumeacha vyote tukakufuata.
Akawaambia, Amin, nawaambia, Hakuna mtu aliyeacha nyumba, au wazazi, au ndugu, au mke, au watoto, kwa ajili ya ufalme wa Mungu;
ambaye hatapokea mara nyingi zaidi wakati huu, na katika ulimwengu ujao uzima wa milele.
Kisha akawachukua wale Thenashara, akawaambia, “Tazameni, tunapanda kwenda Yerusalemu, na mambo yote yaliyoandikwa na manabii kumhusu Mwana wa Adamu yatatimizwa.”
Kwa maana atatiwa mikononi mwa Mataifa, naye atamdhihaki, na kutendewa vibaya, na kutemewa mate;
Nao watamchapa mijeledi na kumwua, na siku ya tatu atafufuka.
Nao hawakuelewa hata neno moja la hayo, na neno hilo lilikuwa limefichwa kwao, wala hawakuyajua yaliyonenwa.
Ikawa alipokuwa akikaribia Yeriko, kipofu mmoja alikuwa ameketi kando ya njia akiombaomba.
Aliposikia umati wa watu wakipita, aliuliza maana yake.
Wakamwambia, “Yesu wa Nazareti anapita.”
Akapaza sauti akisema, Yesu, Mwana wa Daudi, nihurumie.